Latviyada emlanmagan deputatlar o‘z ishidan chetlatiladi

Hujjat 15 noyabrdan kuchga kiradi. Shu kundan boshlab COVID-sertifikatlari bo‘lmagan deputatlarga parlamentning onlayn va oflayn yig‘ilishlarida hamda komissiyalar ishida ishtirok etish taqiqlanadi.

Deputatlar parlamentning mandat, axloq va bayonotlar bo‘yicha komissiyasiga emlanganlik haqidagi sertifikatini ko‘rsatishlari kerak bo‘ladi. Ta'kidlanishicha, seymning navbatdagi yig‘ilishida komissiya sertifikati bo‘lmagan va shu sababli yig‘ilishlarda ishtirok eta olmaydigan deputatlarni ma'lum qiladi.

Reuters axborot agentligining xabar berishicha, ayni vaqtda seymning 100 deputatidan 9 nafari emlanishdan bosh tortgan. Shu bilan birga, tibbiy ko‘rsatmalarga ko‘ra emlanishi tavsiya qilinmaydigan deputatlar o‘z ishini davom ettira oladi.

Ma'lumotlarga ko‘ra, seym ushbu chorani hukumatning koronavirusga qarshi siyosatiga nisbatan aholi o‘rtasida ishonchni oshirish maqsadida qabul qilgan.

Reuters’ning ta'kidlashicha, Latviya Yevropa ittifoqi davlatlari orasida aholisi eng kam darajada emlangan davlatlardan biri bo‘lib qolmoqda. Mamlakatda aholining 65 foizi koronavirusga qarshi vaksinaning bir dozasi, 58 foizi esa ikki dozasi bilan emlangan. Bu orada Yevropaning aksariyat davlatlarida bu ko‘rsatkichlar 76 foizdan yuqoriroqni tashkil qilmoqda.

Shuningdek, 15 noyabrdan Latviyada karantin qat'iylashtirilmoqda. Jumladan, mamlakatda komendantlik soati kiritiladi, o‘quvchi va talabalar masofadan o‘qishga o‘tkaziladi, birinchi ehtiyojdagi tovarlar sotiluvchi do‘konlargina ochiq qoladi.