Ilon Mask yana 1 mlrd dollarlik aksiyalarini sotdi

Tesla bosh direktori Ilon Mask 1,01 mlrd dollarga 934 ming donadan ortiq aksiyalarini sotdi.

Mask to‘rt haftadan buyon o‘z kompaniyasining aksiyalar paketlarini sotmoqda. U shu kunga qadar qiymati 10 mlrd dollardan ortiq aksiyalarini sotdi.

U 6 noyabrda Twitter’da foydalanuvchilar o‘rtasida o‘z aksiyalarini sotish borasida so‘rovnoma o‘tkazgandi. Mask buni 15 mlrd dollarlik soliqni to‘lash uchun qilayotganini aytgandi. Foydalanuvchilarning aksariyati uning bu fikrini qo‘llab-quvvatlaganidan so‘ng 8 noyabr kuni 1,1 mlrd dollarlik dastlabki aksiyalar paketini sotdi.

Bloomberg agentligining yozishicha, aksiyalarni sotish sxemasi so‘rovnoma o‘tkazilishidan oldinroq ishlab chiqilgan.

Ilon Mask dunyoning eng boy odami hisoblanadi. Bloomberg milliarderlar indeksiga ko‘ra, uning boyligi miqdori 300 mlrd dollardan ortiq.