Britaniyada davlat xizmatchilariga “Brexit” so‘zini qo‘llamaslik tavsiya qilindi

Britaniyada davlat xizmatchilariga “Brexit” so‘zini qo‘llamaslik va “Britaniyaning Yevropa ittifoqidan chiqishi”ga iqtibos keltirmaslik tavsiya qilindi. Bu haqda Daily Mail nashri xabar berdi.

Ta’kidlanishicha, hukumat o‘z xodimlariga “Brexit” so‘zini ishlatishdan qochishni tavsiya qilgan. Ushbu so‘zning faqatgina tarix bilan bog‘langandagina qo‘llanishiga ruxsat berilgan.

“Xodimlarga, shuningdek, “o‘tish davri” (transition period) atamasidan voz kechish tavsiya qilingan. Ushbu atama Britaniyaning Yevropa ittifoqi tarkibidan chiqishi holatiga London va Bryussel kelgusi munosabatlari uchun shartlarni ishlab chiqqan oylarga taalluqli”, deb yozilgan nashrda.

Britaniyaning Yevropa ittifoqidan chiqishi bo‘yicha referendum 2016 yilda bo‘lib o‘tgan. O‘shanda Britaniyaning Yevropa ittifoqidan chiqishi, ya’ni Brexit tarafdorlari 51,9 foiz ovoz bilan g‘alaba qozonishgan. Birlashgan Qirollikning turli qismlarida ovoz berish natijalari bir-biridan farqlangan: Shotlandiya va Shimoliy Irlandiyada Yevropa ittifoqidan chiqishga qarshi bo‘lishgan, Angliya va Uelsda esa Brexit qo‘llab-quvvatlangan.