Ekopartiya raisi Ekoqo‘mita raisi etib tayinlanadi

Bugun, 30 dekabr kuni Oliy Majlis Qonunchilik palatasi yalpi majlisida Narzullo Oblomurodov nomzodi Ekologiya va atrof-muhitni muhofaza qilish davlat qo‘mitasi raisi lavozimiga ma’qullandi. Bu haqda parlament quyi palatasi matbuot xizmati xabar qildi.

46 yoshli Narzullo Oblomuradov shu yil fevralidan buyon O‘zbekiston Ekologik partiyasi Markaziy kengashi Ijroiya qo‘mitasi raisi bo‘lib ishlab kelayotgandi.

U shu yil oktabr oyidagi prezident saylovida 670 641 nafar saylovchining (4,14 foiz) ovozi bilan 4-o‘rinni egallagan.

Ekologiya qo‘mitasi raisi lavozimi 4 oydan buyon vakant edi. Sobiq rais Alisher Maqsudov bu mansabdagi 8 oylik faoliyatidan keyin, tanqidiy ruhda o‘tgan prezident yig‘ilishida ishdan olingandi.

Narzullo Oblomurodovga bu qo‘mita begona emas, u 2020 yil aprelidan Ekoqo‘m raisining birinchi o‘rinbosari sifatida faoliyat yuritgan.

Faoliyati davomida, shuningdek, Prezident administratsiyasida mas’ul xodimi bo‘lib ishlagan Oblomurodov 2019 yilda “Sodiq xizmatlari uchun” medali bilan taqdirlangan.

Avvalroq, Ekopartiya Jizzaxdagi atrofi betonlangan daraxtlar voqeasi sabab Ekoqo‘mitani tanqid qilgandi.