Xorazmda ko‘chma sirk va hayvonot bog‘i tashkil etiladi

«Madaniyat va san’at sohasini yanada rivojlantirishga doir qo‘shimcha chora-tadbirlar to‘g‘risida»gi prezident qarorining Xorazm viloyatida ijrosini ta’minlash bo‘yicha chora-tadbirlar belgilandi.

Unga ko‘ra, viloyatda 2022 yil oxiriga qadar mahalliy budjet mablag‘lari hisobiga ko‘chma sirk (shapito, dorbozlar guruhi) hamda hayvonot bog‘ini tashkil etiladi va doimiy faoliyat yuritishi ta’minlanadi.

Bundan tashqari, har bir umumiy o‘rta ta’lim muassasasida musiqa amaliy to‘garaklari tashkil etiladi. Unda o‘quvchilarning 7 ta milliy musiqa cholg‘ulari – dutor, do‘mbira, doyra, tanbur, rubob, g‘ijjak, naydan birini chalishni o‘rganishi ta’minlanadi.

Musiqiy savodxonlikni oshirishga qaratilgan lektoriy konsertlari tashkil etiladi, ularning badiiy dasturlar loyihasi ishlab chiqilib, tasdiqlash uchun Madaniyat vazirligiga kiritiladi.

2024 yil noyabr oyiga qadar zamonaviy texnologiyalarni joriy etgan holda viloyatda «Golografik teatr» shou loyihalari amalga oshiriladi.