Litva Rossiya gazidan to‘liq voz kechdi

Litva apreldan boshlab Rossiyadan tabiiy gaz olishdan voz kechdi. Bu haqda mamlakat energetika vazirligi ma’lum qildi.

Vazirlik Litvaning Amber Grid gaz yetkazish operatori ma’lumotlarini keltirdi. Unga ko‘ra, 2 aprel holatiga Rossiyadan Litvaga gaz import qilish 0 MVt/soatga teng bo‘lgan.  

Qayd etilishicha, mamlakat Klaypeda suyultirilgan tabiiy gaz terminali orqali o‘zini gaz bilan to‘liq ta’minlaydi.

Avvalroq Litva markaziy banki boshqaruvi raisi Gediminas Shimkus mamlakat 40 foiz gazni Rossiyadan import qilishini aytgandi.

«Bu oz emas, ammo qo‘shnilarimizga nisbatan (Latviya, Estoniya, Finlyandiyada bu ko‘rsatkich 80 foizni tashkil qiladi) yaxshiroq holatdamiz», — degandi u.