Shavkat Mirziyoyev Narendra Modiga hamdardlik yo‘lladi

Prezident matbuot kotibi Sherzod Asadovning xabar qilishicha, davlat rahbari Hindiston shimoli-sharqidagi hududlarda yuz bergan tabiiy ofatlar oqibatida ko‘plab insonlar qurbon bo‘lgani munosabati bilan hamdardlik yo‘llagan.

Avvalroq Hindiston hukumati shimoli-sharqiy Assam va Megxalaya shtatlarida kuchli suv toshqinlari oqibatida 63 kishi halok bo‘lganini tasdiqlagan edi. Ungacha 31 kishi vafot etgani xabar qilingan. O‘nlab odamlarning taqdiri noma’lumligicha qolmoqda.
 
4000 ga yaqin qishloq suv toshqinlari zonasida edi. 230 dan ortiq yo‘l suv ostida qolgan yoki ko‘chkilar tufayli to‘sib qo‘yilgan. Hukumat tomonidan 514 ta vaqtinchalik turar joy lagerlari tashkil etilgan. Ularga suv bosgan qishloqlardan 156 mingga yaqin odam ko‘chib kelgan. Hindiston hukumati tabiiy ofatdan jabr ko‘rgan hududlarga yordam haqida va’da bermoqda.