Oliy ilm-fan maktabi tashkil etiladi

27 sentabr kuni prezident Shavkat Mirziyoyev huzurida arxitektura-qurilish sohasida kadrlar tayyorlash tizimini takomillashtirish chora-tadbirlari bo‘yicha taqdimot o‘tkazildi.

Rasmiy relizga ko‘ra, oxirgi yillarda qurilishlar ko‘lami oshgan bo‘lsa ham, soha bo‘yicha ta’lim va ilm bundan ancha ortda qolmoqda. Institutlardagi o‘quv dasturlari eskirgan. O‘qitiladigan fanlar soni chet eldagidan ham ko‘p, sifati unday emas. Ta’lim jarayoniga amaliyotchi mutaxassislar yetarli darajada jalb etilmagan. Zamonaviy fikrlaydigan injyener-konstruktorlar yetishmayapti.

Prezident shu yil 6 iyul kungi selektorda sohadagi OTMlarni transformatsiya qilish zarurligini aytgan edi. Taqdimotda Toshkent va Samarqanddagi arxitektura institutlarining o‘quv dasturlarini isloh qilib, ta’lim sifatini xalqaro darajaga olib chiqish choralari muhokama qilindi.

Mutasaddilar bu institutlarning o‘quv dasturlarini xalqaro akkreditatsiyadan o‘tkazish, yangi fakultetlar tashkil etish, ta’lim va ishlab chiqarishni uyg‘unlashtirish, ilmiy faoliyatni takomillashtirish rejalarini bayon qildi.

Prezident bu takliflarni ma’qullab, ustuvor vazifalarni ko‘rsatib o‘tdi. Avvalo, bakalavr yo‘nalishlari sonini qayta ko‘rib chiqib, fanlarni zamonaviy shaharsozlik va texnologiyalarga moslashtirish zarurligi ta’kidlandi. O‘qituvchilar uchun malaka talablari va bitiruvchilarning kompetensiyalarini oshirish bo‘yicha tavsiyalar berildi.

Institutlarga xorijiy tajribaga ega malakali mutaxassislarni jalb etish, shuningdek, mahalliy professor-o‘qituvchilarni chet elga ilmiy stajirovkaga yuborish muhimligi qayd etildi. Bu borada Toshkent arxitektura-qurilish instituti Istanbul texnika universiteti bilan, Samarqand davlat arxitektura-qurilish instituti Yildiz texnika universiteti bilan ta’lim hamkorligini yo‘lga qo‘yadi.

Ta’lim va amaliyot uyg‘unligini ta’minlash maqsadida har bir kafedraga ishlab chiqaruvchi korxonalarni biriktirish, institutlar huzurida texnopark va inkubatsiya markazi tashkil etish bo‘yicha ko‘rsatma berildi. Ularda energiya tejamkor qurilish materiallari yaratish, yetakchi kompaniyalar bilan mahorat darslari va amaliy treninglar o‘tkazish, ilmiy-tadqiqot natijalarini tijoratlashtirish mumkin bo‘ladi.

Shuningdek, ilg‘or muhandislik bilimlari asosida ilmiy va ilmiy-pedagogik kadrlar tayyorlaydigan Oliy ilm-fan maktabi tashkil etilishi belgilandi.

Institutlar huzuridagi akademik litseylarni ham takomillashtirib, A-level darajasidagi o‘quv dasturi va metodikasini joriy etish zarurligi qayd etildi.