Belarusda davlatga xiyonat qilgan amaldorlar va harbiylar o‘limga mahkum etiladi 

Belarus prezidenti Aleksandr Lukashenko davlatga xiyonat qilgan mansabdor shaxslarga o‘lim jazosi berilishini nazarda tutuvchi qonunni imzoladi. Bu haqda «Pul pervogo» xabar berdi. 

Mansabdor shaxs yoki harbiy shaxs tomonidan sodir etilgan «davlatga xiyonat» uchun o‘lim jazosi bilan bir qatorda, «terrorizmni targ‘ib qilish», qurolli kuchlarni «obro‘sizlantirish» va «davlat sirlarini himoya qilish talablarini buzish» uchun ham jinoiy javobgarlik joriy etildi. 

Belarus Yevropada o‘lim jazosini qo‘llaydigan yagona davlatdir. So‘nggi o‘n yil ichida bir necha odam qatl qilindi. Huquq himoyachilari o‘lim jazosi rasmiylar tomonidan soxta jinoiy ishlar bo‘yicha javobgarlikka tortilgan muxolifatchilarga bosim va tahdid sifatida qo‘llanilishi mumkinligini doimo qayd etib keladi.