Abduqodir Husanov «MYu»ga qarshi o‘yin uchun «Lans» tarkibidan joy oldi

5 avgust, shanba kuni «Old Trafford»da o‘tadigan o‘rtoqlik o‘yini uchun Fransiya klubining tarkibi e’lon qilindi. Unga ko‘ra, lansliklar bosh murabbiyi Frank Ez Abduqodir Husanovni ham Manchesterga yo‘l olgan 22 futbolchidan iborat tarkibga kiritgan. O‘zbekistonlik 19 yoshli himoyachi «Manchester Yunayted»ga qarshi bahsda maydonga tushishi mumkin.

O‘tgan haftada «Lans» o‘yinchisiga aylangan Husanov bungacha jamoasining «Volfsburg» (1:1) va «Torino»ga (0:0) qarshi o‘yinlarida zaxiradan maydonga tushgandi.

Ma’lumot uchun, «Lans»ga qarshi o‘yin «MYu» uchun kelasi hafta start oladigan Premer-liga yangi mavsumi oldidan «Old Trafford»da o‘tkazayotgan birinchi o‘yin sanaladi. O‘rtoqlik bahsi soat 5 avgust, shanba kuni soat 16:45da boshlanadi.