AQShda hukumatning Google’ga qarshi da’vosi yuzasidan sud boshlandi

AQShda 12 sentabr, seshanba kuni internet qidiruv tizimlari bozorini monopollashtirish va adolatli raqobat qoidalarini buzganlikda ayblanayotgan Google kompaniyasiga qarshi hukumat da’vosi bo‘yicha sud jarayoni boshlandi, deb xabar bermoqda AFP. 

«Bu ish internet kelajagi haqida - Google qachondir internet-qidiruvda jiddiy raqobatga duch keladimi yoki yo‘qmi, aynan shu bo‘yicha», dedi AQSh hukumati yuristi Kennet Dinser sudning birinchi eshituvida. 

AQSh Adliya vazirligi ma’lumotlariga ko‘ra, Google nohaqlik bilan qidiruv bozorida ustun mavqega erishgan. Kompaniya Google qidiruv tizimi ustun turishi uchun Apple va Samsung kabi mobil telefon ishlab chiqaruvchilarga yiliga 10 milliard dollargacha to‘laydi. 

Ushbu joyni boshqarish tufayli Google shuningdek, kontekstli reklama va foydalanuvchi manfaatlari bo‘yicha anonim ma’lumotlar bilan savdo qilish sohasida monopolistga aylanadi. Dinser ushbu sxemani Google hukmronligi tobora kuchayib borayotgan «shafqatsiz doira» deb atadi. 

Google ayblovlarni rad etdi 

Internet qidiruv tizimlari bozorining qariyb 90 foiziga ega bo‘lgan Google ayblovlarni rad etdi va qidiruv tizimining muvaffaqiyati uning raqobatchilaridan yaxshiroq ekanligi bilan izohlanishini bildirdi. «Google o‘nlab yillar davomida o‘zining qidiruv tizimini innovatsiya qilib, takomillashtirib kelmoqda», dedi sudda Google yuristi Jon Shmidtleyn. 

Kompaniya, shuningdek, Google mahsuloti bepul ekanligini va qidiruv tizimidan foydalanish majburiy emasligini ta’kidladi, uni qurilmadan olib tashlash va boshqasini o‘rnatish mumkin. 

Microsoft jarayonidan keyin IT sohasidagi eng katta sud

Shu paytgacha IT-sohasidagi eng yirik monopoliyaga qarshi ish AQSh rasmiylari 1998 yilda surishtiruv boshlagan Microsoft ishi bo‘lgan. O‘shanda kompaniya operatsion tizimlar bozorini monopollashtirishda ayblandi. Huquqiy nizolar 2001 yilda Adliya vazirligi va Microsoft o‘rtasidagi kelishuv bilan yakunlandi. 

Joriy jarayon kamida 10 hafta davom etishi kutilmoqda. Agar sudya Google raqobat to‘g‘risidagi qonunni buzganiga rozi bo‘lsa, u bir qator, jumladan, qidiruv tizimining biznesini bo‘lish choralarini ko‘rishi mumkin, deb yozadi AFP.