Sergelida 20 nafar ekspert mol-mulklarga yetgan zararni baholayapti

Sergeli tumanida sodir bo‘lgan favqulodda vaziyat yuzasidan olib borilayotgan zaruriy chora-tadbirlarga adliya organlari ham jalb etildi.  

Xususan, vazirlik huzuridagi X.Sulaymonova nomidagi respublika sud ekspertiza markazining 20 nafar eksperti voqea sodir bo‘lgan joyda ish olib bormoqda. Ular holat bo‘yicha tayinlangan tegishli sud ekspertizalari yuzasidan obektlarni dastlabki ko‘zdan kechirish, xodisa kelib chiqish sabablarini o‘rganish, fuqarolarning mol-mulklariga yetkazilgan zararlar miqdorlarini aniqlash ishlarini amalga oshirishyapti.

Ekspertlar Bosh vazir o‘rinbosari Ochilboy Ramatov boshchiligida favqulodda vaziyatni o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha tuzilgan Hukumat komissiyasi tomonidan jalb etilgan.  

Shuningdek, adliya organlarining mas’ul xodimlari jabr ko‘rgan aholi bilan uchrashib, ularga tegishli huquqiy tushuntirishlar bermoqda. Fuqarolarning yaroqsiz holga kelgan yoki yo‘qolgan shaxsiy hujjatlarini tiklashga amaliy yordam ko‘rsatilyapti.