Qashqadaryoda svetoforda to‘xtab turgan Nexia yonib ketdi

Qashqadaryo viloyati Chiroqchi tumanida 28 dekabr kuni svetoforning qizil chirog‘ida to‘xtab turgan Nexia-2 avtomobilida yong‘in chiqdi. Bu haqda «Zamon» informatsion dasturida ma’lum qilindi.

Nexia haydovchisining so‘zlariga ko‘ra, yong‘in kutilmaganda yuz bergan va u sherigi bilan o‘zini chetga olgan. Ijtimoiy tarmoqlarda tarqalgan videoda yonayotgan mashina harakatlanib borib, boshqa bir avtomobilga urilgani va unga ham shikast yetkazgani aks etgan.

«Mashinam qiyalikda turgandi, alangani ko‘rib qo‘l tormozni tortishni esdan chiqardik. Bizning aybimiz beye’tibor bo‘lib, mashinani o‘z vaqtida texnik ko‘rikdan o‘tkazmaganimizda bo‘ldi», — deydi haydovchi.

Hodisa joyiga bitta yong‘in-qutqaruv ekipaji yetib kelgan va ular olovni o‘chirgan.

Hodisa oqibatida jarohatlanganlar yo‘q, Nexia to‘liq yonib ketgan.