Olimlar: 2024 yil yana rekord darajada issiq bo‘lishi mumkin

2024 yil rekord darajadagi eng issiq yil bo‘lishi mumkin, garchi iyul oyida harorat rekordlarining 13 oylik seriyasi yakunlangan bo‘lsa ham. Bu haqda 7 avgust, chorshanba kuni Yevrokomissiya tomonidan qo‘llab-quvvatlanadigan va YeI tomonidan moliyalashtirilgan Copernicus (C3S) iqlim o‘zgarishi monitoringi xizmati tomonidan ma’lum qilindi. O‘tgan oy 1940 yildan beri rekord darajadagi ikkinchi eng issiq oy bo‘ldi, bu 2023 yil iyulidan biroz salqinroq, xolos. O‘tgan yilning iyunidan 2024 yilning iyunigacha har oy yil fasli uchun yangi harorat rekordi o‘rnatildi.

Iyul oyida o‘rtacha global harorat Tselsiy bo‘yicha 16,91 darajani tashkil etdi, bu o‘tgan yilning shu oyiga nisbatan atigi 0,04 darajaga past. Ammo «umumiy kontekst o‘zgarmadi, bizning iqlimimiz isishda davom etmoqda», dedi C3S rahbari o‘rinbosari Samanta Berjyess. Uning so‘zlariga ko‘ra, iqlim o‘zgarishi halokatli oqibatlari 2023 yildan ancha oldin boshlangan va global parnik gazlar tashlamalari nol darajaga yetguncha davom etadi.

Yanvardan iyulgacha global harorat 1991-2020 yillardagi o‘rtacha ko‘rsatkichdan 0,7 darajaga yuqori bo‘lgan. 2024 yil o‘tgan yilga qaraganda issiqroq bo‘lishining oldini olish uchun bu anomaliya joriy yil qolgan qismida sezilarli darajada kamayishi kerak. Shunday qilib, «2024 yil rekord darajadagi eng issiq yil bo‘lishi ehtimoli ortib bormoqda», deya ma’lum qildi Copernicus xizmati.

Iyulda rekord darajadagi eng issiq ikki kun bo‘ldi

2024 yil iyul oyi 1850-1900 yillar oralig‘ida o‘sha oy uchun hisoblangan o‘rtacha haroratdan 1,48 daraja Tselsiy bo‘yicha issiqroq bo‘ldi. Yer tarixidagi eng issiq ikki kunni boshidan kechirdi va 22 va 23 iyul kunlari global o‘rtacha harorat haqiqatda tenglashdi hamda 17,6 darajaga yetdi.

Inson faoliyati tufayli yuzaga keladigan ortiqcha issiqlikning 90 foizini o‘ziga singdiruvchi okeanlardagi harorat iyul oyida eng yuqori rekord darajaga yaqinlashdi, ya’ni 20,88 daraja Tselsiy bo‘yicha, bu 2023 yil iyulidan atigi 0,01 daraja past. Biroq, Copernicus olimlarining ta’kidlashicha, global harorat keskin oshishiga hissa qo‘shgan El-Ninyo ob-havo rejimi uning sovigan varianti La-Ninyaga o‘tganiga qaramay, «ko‘p mintaqalarda okean harorati g‘ayrioddiy darajada issiq bo‘lib qolyapti».