“Gold terapi” ishi: Xayrulla Qosimov va boshqalar ustidan tergov boshlandi

“Gold terapi” nomi bilan noan’anaviy usulda davolashni taklif qilib, turli kasalliklarga chalingan fuqarolarni “100 foiz davolash kafolati” bilan ishontirib, ularning bir necha o‘n ming dollarlab pullarini qo‘lga kiritib kelgan Xayrulla Qosimovga nisbatan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) bilan jinoyat ishi qo‘zg‘atilgan.

Bu haqda Ichki ishlar vazirining matbuot kotibi Shohrux G‘iyosov Kun.uz’ga ma’lum qildi.

Kun.uz manbasiga ko‘ra, “Gold terapi” ishi bo‘yicha Xayrulla Qosimov ustidan ichki ishlar organlariga mingga yaqin ariza tushgan. Ular soni kundan kunga oshmoqda. Tergov jarayonida “Gold terapi” klinikasi faoliyati ham taftish qilinadi. Jinoyat ishi shu yil mart oyining boshida qo‘zg‘atilgan.

Kun.uz oldinroq “Gold terapi” bo‘yicha ikki qismli katta jurnalistik surishtiruvini e’lon qilgandi. Unda o‘zini professor, tabib, filantrop, psixoximik, “Gold terapi” asoschisi deb e’lon qilgan Xayrulla Qosimovdan jabrlanganlar o‘z hikoyalarini aytib berishgan edi. Odamlar uning bitta konsultatsiyasi uchun 24 mln so‘m, davolashi uchun 20 ming dollarlab pul to‘lashgan.

Jabrlanuvchilarning barchasi Xayrulla Qosimov davolash bahonasida ularga giyohvand ichimlik ichirganini ta’kidlashgan.

Jabrlanganlarning aksariyati xonanda Samandar Hamroqulov va YouTube'dagi Chotki.tv kanalining reklamasi sabab ularga ishonib borishganini aytishgan.

Shundan so‘ng Samandar Hamroqulov Kun.uz’ga intervyu berib, o‘zi ham aldanganini, “vijdon azobida qolib ketganini” ma’lum qildi.

Xonandaning aytishicha, u ham shu ichimlik ta’sirida bo‘lgan, ammo ko‘rsatuvni ko‘rgunga qadar bu haqida o‘zi ham bilmagan. Tanishlarining tavsiyasi bilan xotiraning pasayishi, uzluksiz charchoq, uyqusizlik sababli “professor” qabuliga borgan va uning ta’siriga tushib qolgan.

Yaqin kunlarda ushbu klinika faoliyati va Xayrulla Qosimovning g‘ayrioddiy davolash usuli yuzasidan Tailandda o‘tkazilgan 3-maxsus surishtiruv Kun.uz’da sahifasida ko‘rishingiz mumkin.