O‘zbekiston | 17:00 / 05.04.2025
6249
2 daqiqa o‘qiladi

“Yosh kitobxon” tanlovining 2024-2025 yilgi mavsumi g‘oliblari aniqlandi

Prezident Shavkat Mirziyoyev tashabbusi bilan mamlakatda kitobxonlikni rivojlantirish maqsadida har yili o‘tkazish an’anaga aylangan mazkur tanlovning bu yilgi mavsumida barcha yosh toifasida qizlar birinchilikni qo‘lga kiritdi. Ular BYD Chazor elektromobillari bilan taqdirlandi.

Foto: Yoshlar ishlari agentligi

Yoshlar ishlari agentligi tomonidan o‘tkazib kelinadigan “Yosh kitobxon” tanlovining 2024-2025 yilgi mavsumi g‘oliblari aniqlandi.

Alisher Sa’dullayevning ma’lum qilishicha, bu safargi mavsumda barcha yosh toifasida birinchilikni qizlar qo‘lga kiritgan.

“Bu qizlarga berilayotgan e’tibor, ularning bilimga chanqoqligi va kitobga bo‘lgan qiziqishi qanchalik ortganligining belgisi” deb yozdi u.

Shuningdek, g‘oliblar haqida ham ma’lumot berildi:

• Dilbarxon Haydarova — Toshkent shahar Bo‘z mahallasidan 10-14 yosh toifasi g‘olibi. Otasi Bo‘ronov Firuzbek, hisobchi.

• O‘g‘iljayron Xaldurdiyeva — Qoraqalpog‘iston Respublikasi, To‘rtko‘l tumani Kaltaminor mahallasidan 15-19 yosh toifasi g‘olibi. Otasi So‘yunov Abajan, dehqonchilik bilan shug‘ullanadi.

• Maftuna Ochilova — Xorazm viloyati, Nurli hayot mahallasidan 20-30 yosh toifasi g‘olibi. Onasi Ochilova Dildora, nafaqada.

G‘oliblarning har biriga Prezident sovg‘asi — BYD Chazor elektromobillari tantanali ravishda topshirildi.

Bundan tashqari, tanlovda ikkinchi o‘ringa — 75 mln so‘mdan, uchinchi o‘ringa — 50 mln so‘mdan, final bosqichi ishtirokchilarining barchasiga esa 10 mln so‘mdan pul mukofotlari berildi.

Mavzuga oid