Xususiy klinika litsenziyasini olish tartibi qanday?

SSV matbuot xizmati ushbu savolga Tibbiyot tashkilotlarini litsenziyalash va akkreditatsiyalash markazi direktori Jaloliddin Asamutdinovdan javob oldi.

— Mamlakatimizda tibbiy faoliyatni litsenziyalash yo‘nalishi bir qancha qonuniy, normativ-xuquqiy hujjatlar bilan tartibga solinadi, — deydi u.

— So‘nggi yillarda soha raqamlashtirilishi tufayli litsenziya olishda turli ovoragarchilik va byurokratik to‘siqlarga chek qo‘yildi. Natijada aholiga ko‘plab qulayliklar yaratildi. 

Ayni paytda nodavlat tibbiyot muassasalari uchun litsenziya olishning soddalashtirilgan talab va mezonlari mavjud bo‘lib, ular bir necha bosqichda amalga oshiriladi.

Unga ko‘ra, dastlab talabgor yoki uning nomidan ish yuritish vakolatiga ega bo‘lgan shaxs o‘z elektron raqamli imzosi (ERI) yordamida (talabgor — jismoniy shaxslar uchun ERI o‘rniga Mobil-ID tizimidan ham foydalanishi mumkin) “Lisenziya” axborot tizimi (license.gov.uz) yoki Yagona iteraktiv davlat xizmatlari portali (my.gov.uz ) orqali ro‘yxatdan o‘tadi.

So‘ng faoliyatning litsenziyalanadigan, shu jumladan, har bir kichik turini ko‘rsatgan holda elektron shaklda ariza to‘ldiradi.

Arizada quyidagi ma’lumotlar ko‘rsatilishi lozim:

• ariza to‘ldirish sababi (yangi litsenziya olish, qayta rasmiylashtirish, muddatini uzaytirish, o‘zgartirish);
• yuridik shaxsning nomi, tashkiliy-huquqiy shakli, uning pochta manzili, faoliyatni amalga oshirish joyi, bank muassasasining nomi va bank hisob varag‘i, telefon raqami, STIR, elektron pochta manzili (agar bo‘lsa);
• tibbiy faoliyatni amalga oshirish manzili ma’lumotlari (kadastr, ijara shartnomasi);
• tanlangan tibbiy faoliyat amalga oshiriladigan tibbiy ixtisosliklar va (yoki) tibbiy xizmat turlari (tibbiy muolajalar va (yoki) tibbiy usullar);
• tibbiy yordam ko‘rsatish shakllari (ambulator, statsionar);
• tibbiyot xodimlari to‘g‘risida ma’lumot (pasport ma’lumotlari, o‘quv yurtlarini tamomlaganligi to‘g‘risidagi hujjat, "Yagona milliy mehnat tizimi" (YaMMT)da ro‘yxatdan o‘tganligi to‘g‘risidagi ma’lumot);
• talabgorning litsenziya talablari va shartlariga rioya qilishga roziligi;
• litsenziya berish yoki litsenziya berishni rad etish to‘g‘risidagi qaror 30 kun muddat ichida qabul qilinadi.

Lisenziya berish bir necha hollarda rad etiladi. Xususan:

• zarur hujjatlarni to‘liq bo‘lmagan hajmda taqdim etish;
• talabgorning litsenziya talablari va shartlariga mos kelmasligi;
• taqdim etilgan hujjatlarda yolg‘on yoki noto‘g‘ri ma’lumotlar bo‘lishi;
• o‘tkazilishi shart bo‘lgan o‘rganishlar, tadqiqotlar, tekshirishlar yoki boshqa ilmiy va texnik baholashlarning yakunlari bo‘yicha asoslangan salbiy xulosa litsenziya berishni rad etish uchun yetarli bo‘ladi.