Oliy sud tarkibiga o‘zgartirish kiritildi

Oliy Majlis Senatining oltinchi yalpi majlisida O‘zbekiston Respublikasi Oliy sudi tarkibiga o‘zgartirish kiritish to‘g‘risidagi masala ko‘rib chiqildi.

Oliy Majlis Senatining tegishli qaroriga asosan Shamsiddin Mamarejabovich Tojiyev boshqa ishga o‘tganligi munosabati bilan O‘zbekiston Respublikasi Oliy sudining sudyasi lavozimidan ozod etildi.

Shamsiddin Tojiyev 1979 yilda Qashqadaryo viloyatida tug‘ilgan. 2001 yilda Toshkent davlat yuridik institutining bakalavr bosqichini, 2003 yilda shu institutning magistraturasini tamomlagan. Mehnat faoliyatini Oliy sudda maslahatchi lavozimidan boshlab, keyinchalik turli lavozimlarida faoliyat yuritgan.

2008—2013 yillarda jinoyat ishlari bo‘yicha Sergeli tumani sudi sudyasi, 2013—2015 yillarda jinoyat ishlari bo‘yicha Toshkent shahar sudi sudyasi bo‘lgan. 2015 yildan Oliy sud sudyasi lavozimiga saylanguniga qadar Uchtepa tuman sudi raisi lavozimida ishlab kelgan.