XOQ rahbari 32 yil ichida birinchi marotaba Paralimpiada ochilishida ishtirok eta olmaydi

Xalqaro Olimpiya qo‘mitasi prezidenti Tomas Bax Rio-de-Janeyroda bo‘lib o‘tadigan 2016 yilgi Paralimpiya o‘yinlari ochilishi marosimini o‘tkazib yuboradigan bo‘ldi, deb xabar bermoqda Insidethegamez.biz.

Bax Germaniyaning sobiq prezidenti, 24 avgustda 97 yoshida vafot etgan Valter Sheyelga bag‘ishlangan motam marosimida ishtirok etishi kerak.

Baxning o‘rniga Braziliyadagi Paralimpiada ochilishida XOQning rasmiy vakili, janubiy afrikalik Sem Ramsami ishtirok etadi.

Bunday holat, ya'ni XOQ prezidenti Paralimpiada ochilishi marosimida ishtirok eta olmasligi 32 yil ichida birinchi marotaba yuz bermoqda. O‘yinlar bugun, 7 sentabrda ochiladi.