Obama Putinni «KGBning sobiq rahbari» deb atadi

AQSh prezidenti Barak Obama, respublikachilarni tanqid qilish chog‘ida Rossiya prezidenti Vladimir Putinning avvalgi lavozimi borasida xato qildi, deb xabar qilmoqda TASS agentligi.

Obama respublikachilarni, ular doimo Rossiyaga nisbatan qat'iy pozitsiyada bo‘lgani, ammo bu safar Donald Tramp nomzodini ilgari surgani uchun tanqid qilgan. Chunki Tramp, Amerika yetakchisining fikricha, Putinni «namuna olishga arziydigan inson» deb biladi.

«Siz — tashqi siyosat masalalarida keskin qarashlarga ega va Rossiyaga qarshi chiqadigan partiya bo‘lgan holda, KGBning sobiq rahbari bo‘lgan Vladimir Putinga o‘xshashga urinadigan Tramp nomzodini ilgari surdingiz», — degan Obama, bu holatni achinarli deya baho berar ekan. 

Ma'lumki, Vladimir Putin KGB rahbari bo‘lmagan, ammo 1998–1999 yillarda Rossiya Federal xavfsizlik xizmati rahbari lavozimida ishlagan.