Pan Gi Mun Venesuela hukumati va muxolifatni muloqotga chorladi

BMT bosh kotibi Pan Gi Mun Venesueladagi vaziyatdan tashvish bildirib, muxolifat hukumat vakillarini o‘zaro muloqot o‘tkazishga chaqirdi, deb xabar qilmoqda TASS.

«Bosh kotib hukumat va muxolifatning birgalikda harakat qilishi va mamlakatning joriy muammolariga e'tibor qaratishi lozimligiga ishonchi komil. Ular, xususan, Venesuela xalqining ijtimoiy-iqtisodiy manfaatlari yo‘lida birga choralar ko‘rishi kerak», — deyiladi bayonotda. 

Pan Gi Mun shuningdek, qonun va konstitutsiya, inson huquqlari, jumladan fikrlar izhor qilish hamda tinch yig‘ilishlar o‘tkazish huquqi ustunligini birdek tan olish zarurligini yodga olgan. 

Bundan avval, Venesuelada tashkil etilgan hukumatga qarshi namoyishlarda tartibsizliklar ro‘y bergani va otishma sodir bo‘lgani xabar qilingan edi.