Italiyada hijob yechishni rad etgan ayol 30 ming yevrolik jarimaga tortildi

Alban millatiga mansub 40 yoshli ayolga Italiyada jamoat joyida hijob yechishni rad etgani uchun 30 ming yevro jarima solindi. ANSA axborot agentligi xabar berishicha, Pordenone shahri sudyasi ayolga berilgan dastlabki 4 oylik qamoq jazosini shunday miqdordagi jarima bilan almashtirishga qaror qilgan.

Voqea bir oycha avval San-Vito al Talyamento shahar kengashi yig‘ilishi vaqtida yuz bergan. Bu shaharda 2000 yildan beri yashab kelayotgan va yaqinda Italiya fuqaroligini olgan ayol shahar merining jamoat tadbiri ishtirokchilari taniladigan ko‘rinishda bo‘lishlari kerakligi borasidagi talabiga qaramasdan, hijobni yechishdan bosh tortgan. Shundan keyin ayol zaldan olib chiqib ketilgan va jamoatchilik tartibini buzishda ayblangan.

Italiyada 1975 yildan beri jamoatchilik joylarida yuzni berkituvchi bosh kiyimlar, jumladan mototsikl shlemlarida bo‘lishni taqiqlovchi qonun amal qilib keladi. Bu qonun jinoyatchilikka qarshi kurashga qaratilgan. Oxirgi yillarda Italiyaning ba'zi shaharlari, jumladan Milan bu qonunni qat'iylashtirgan. Bu choralarga ko‘ra, hijoblarda bo‘lgan ayollarga ularni shifoxonalarda ham yechish majburiy qilib qo‘yilgan.