DiKaprio Tramp bilan uchrashdi

Amerikalik aktyor Leonardo DiKaprio va uning jamg‘armasi rahbari Terri Tamminen AQShning saylangan prezidenti Donald Tramp bilan uchrashdi, deb xabar beradi Associated Press. Uchrashuv Nyu-Yorkda bo‘lib o‘tgan.

Tomonlar atrof-muhitni muhofaza qilish bog‘liq ishlarning iqtisodiyotga ta'sirini muhokama qilishdi. Leonardo DiCaprio Foundation rahbari bo‘lgan Tamminenning aytishicha, ular saylangan prezident, uning qizi Ivanka Tramp va prezident jamoasining boshqa a'zolariga qayta tiklanuvchi quvvat manbalari millionlab yangi ish o‘rinlarini yaratishga yordam berishini ko‘rsatib berishgan.

Ma'lumot uchun, DiKaprio iqlim o‘zgarishi va yovvoyi tabiatni asrab qolish uchun faol kurash olib boradi. Yaqinda esa uning ishtirokidagi “Sayyorani qutqarish” nomli hujjatli film chiqdi. 

Xabarlarga ko‘ra, Tramp aktyorga yanvar oyida yana bir bor uchrashishni taklif qilgan.