Yangi Zelandiya hukmron partiyasi mamlakat bosh vazirini tayinladi

Yangi Zelandiya hukmron milliy partiyasi sobiq moliya vaziri Bill Inglishni bosh vazirlikka sayladi, deb xabar qilmoqda Reuters agentligi.

Ta'kidlanishicha, yangi bosh vazir saylovi partiya faollarining yig‘ilishida bo‘lib o‘tgan. Shu bilan birga, qayd etish joizki, Inglish bu lavozimga ko‘rsatilgan yagona nomzod bo‘lgan. Xabarga ko‘ra, siyosatchi bugunning o‘zida qasamyod qiladi. 

Avvalroq, Yangi Zelandiya politsiya vaziri Judit Kollinz, Jon Ki lavozimidan iste'fo bergach, bosh vazirlikka nomzodini ilgari surishini bildirgan edi. Ki oilaviy sabablarga ko‘ra, vazifasini tark etishga qaror qilgandi. 

Ayni chog‘da, hukumat rahbarligiga asosiy nomzod sifatida bosh vazir o‘rinbosari va moliya vaziri Bill Inglish ko‘rsatilgan, Jon Ki uni qo‘llab-quvvatlashini ma'lum qilgan edi.