OAV: Suriyada sodir bo‘lgan kuchli portlash oqibatida 60 kishi halok bo‘ldi

Suriya shimolidagi Azaz shahrida sodir bo‘lgan kuchli portlash oqibatida halok bo‘lganlar soni 60 kishiga yetdi. Bu haqda DailySabah nashri xabar bergan. Unga ko‘ra, bir necha o‘nlab insonlar jarohatlangan. Biroq ushbu ma'lumot hozircha tasdiqlanmagan.

Avvalroq, shahar markazidagi savdo do‘konlari yonida ichiga portlovchi qurilma o‘rnatilgan avtomobil portlagani haqida xabar bergandik. Hodisa Turkiya bilan chegaradan taxminan 10 kilometr uzoqlikda sodir bo‘lgan. Ma'lumotlarga ko‘ra, bu tuman “Ahrar ash-Shom” muxolifat guruhi tomonidan nazorat qilinadi.

Ma'lumot uchun, Suriyadagi qurollangan tuzilmalar ro‘yxati 29 dekabr kuni taqdim etilgan bo‘lib, avvaliga unda "Ahrar ash-Shom" ham bo‘lgan, biroq keyinchalik guruh sulh haqida kelishuvni imzolamagani ma'lum bo‘ldi.