Qudusdagi terakt videosi paydo bo‘ldi

Yeshiva World News nashri YouTube-kanalida Qudusda terrorchi yuk mashinasida harbiylar guruhini bosib ketgan lahza tasvirlangan video paydo bo‘ldi.

Videoda harbiylar avtobus yonida yo‘l chetida turganlarini ko‘rish mumkin. Yuk mashinasi haydovchisi katta tezlikda piyodalar yo‘lkasiga chiqib, harbiylarni bosib, bir necha metr yurib o‘tgan.

Yon atrofdagi odamlar buni ko‘rib voqea joyidan qocha boshlaganlar. Haydovchi odamlarni bosgandan keyin orqaga avtobus tomon yo‘nalib, so‘ngra yana oldinga qarab yurgan.

Qudusda haydovchi harbiylarni bosib ketishi oqibatida 4 kishi halok bo‘ldi, 15 kishi yaralandi. Terrorchi yo‘q qilingan. Hukumat ma'lumotlariga ko‘ra, u IShID bilan bog‘langan bo‘lgan.