AQShda dars vaqtida hojatxonaga chiqarilmagan o‘quvchiga 1,25 mln dollar tovon puli to‘lanadi

AQShning San-Diyego maktab okrugi o‘ziga taalluqli Patrick Henry High School maktabi o‘qituvchisi o‘quvchini dars vaqtida hojatxonaga chiqarmagani uchun jabrdiyda qizga 1,25 mln dollar tovon puli to‘laydigan bo‘ldi.

RT nashri ma'lum qilishicha, voqea 2012 yil fevralda yuz bergan. Gonya Volf ismli o‘qituvchi 14 yoshli o‘quvchini tozalash uchun mo‘ljallangan xonada chelakka yozilib olishga majbur qilgan hamda o‘quvchiga chelak ichidagini sinfda joylashgan rakovinaga oqizishni buyurgan.

O‘quvchi advokatining aytishicha, o‘quvchi "bu kamsituvchi va beadab jazo sababli kuchli stress holatini his qilgan". 

Sud qizga 1,25 mln dollar miqdorida ma'naviy zarar hamda tibbiy sarf-xarajatlar to‘lovi sifatida yana 41 ming dollar to‘lab berish qarorini chiqargan.