Vazirlar Mahkamasi huzuridagi Davlat inspeksiyasi yo‘l-qurilish ishlari sifatini nazorat qiladi

O‘zbekiston Respublikasi Vazirlar Mahkamasi huzurida Yo‘l-qurilish ishlari sifatini nazorat qilish Davlat inspeksiyasi tashkil etiladi. Bu haqda O‘zbekiston Prezidenti Shavkat Mirziyoyev 14 fevral kuni imzolagan «Yo‘l xo‘jaligini boshqarish tizimini yanada takomillashtirish chora-tadbirlari to‘g‘risida»gi farmonida keltirilgan.

Davlat inspeksiyasining asosiy vazifalari va faoliyat yo‘nalishlari quyidagilar bo‘ladi:
- yuridik va jismoniy shaxslar tomonidan yo‘l qurilishi ishlarida, yo‘l-qurilish materiallari, mahsulotlar va konstruksiyalarni ishlab chiqarishda texnik jihatdan tartibga solish sohasidagi normativ hujjatlar talablariga rioya etilishini nazorat qilish; 
- qurilishi tugallangan yo‘l obektlarini foydalanishga qabul qilish bo‘yicha komissiyalar ishida qatnashish; 
- yo‘l qurilishi yuzasidan shaharsozlik qonunchiligiga rioya qilinishi ustidan nazorat qilishni tashkil etish borasida texnik jihatdan tartibga solish sohasida normativ hujjatlarni takomillashtirishga doir takliflar kiritish va unda ishtirok etish; 
- yo‘l-qurilish materiallari, mahsulotlar va konstruksiyalarni standartlashtirish va sertifikatlashtirish ishlarini olib borish.

Prezident farmoni bilan Vazirlar Mahkamasiga bir oy muddatda Yo‘l-qurilish ishlari sifatini nazorat qilish davlat inspeksiyasi faoliyatini tashkil etish to‘g‘risida hukumat qarorini qabul qilish haqida ko‘rsatma berilgan.