Andijonda diniy ekstremizmga qarshi tadbir o‘tkazildi

Andijon viloyati Oltinko‘l tumanida “ Biz yoshlar diniy ekstremizmga qarshimiz” shiori ostida tadbir o‘tkazildi

Tuman madaniyat uyida tashkil etilgan tadbirda hududdagi kasb-hunar kollejlari va umumiy ta'lim maktablarining o‘quvchilari taklif etildi. Jamoat birlashmalari, huquq-tartibot idoralari vakillari ekspert sifatida ishtirok etdilar. 

Tadbirda so‘z olgan tuman hokimi Baxtimurod Karimov yoshlarni diniy ekstremizm oqimlari ta'siridan asrash, shaxs kamolotida, xususan, erishiladigan barcha yutuqlarda asosiy omil chuqur bilim va yuksak ma'naviyat ekani haqida ma'ruza qildi. Shoira Zamira Ro‘ziyeva Vatanni sevish, uni ko‘z qorachig‘idek asrash har bir farzandning burchi ekanligi haqida gapirib, yurtga muhabbat mavzusidagi yangi she'rlaridan o‘qib berdi.
 
Yig‘ilganlar e'tiboriga diniy ekstremistik oqimlarning manfur kirdikorlari fosh etilgan videofilm namoyish qilindi. 

Iqtisodiyot kolleji talabalari tomonidan mavzu asosida tayyorlangan sahna ko‘rinishi, 17-san'at maktabi tarbiyalanuvchilarining badiiy chiqishlari hamda faol iqtidorli yoshlaridan tashkil etilgan “Ulfatlar” quvnoqlar va zukkolar jamoasi chiqishlaridan iborat konsert dasturi barchada katta taassurot qoldirdi.

Kun.uz sayti muxbiri Elmurod Ermatov, Andijon.