Rafael Nadal o‘z faoliyatida yana bir rekord o‘rnatdi

Ispaniyalik tennischi Rafael Nadal yakkalik bahslarida o‘zining minginchi uchrashuvini o‘tkazdi. Bu Mayamidagi musobaqaning uchinchi davrasida germaniyalik Filipp Kolshrayber bilan bahsga to‘g‘ri keldi. Uchrashuv ispaniyalikning 0:6, 6:2, 6:3 hisobidagi g‘alabasi bilan yakunlandi.

Shu tariqa, Nadal bunday ko‘rsatkichga erishgan 11-tennischiga aylandi. Ispaniyalik 822 bora g‘alaba qozongan hamda 178 marta mag‘lubiyatga uchragan. Ro‘yxatda 10-o‘rinni egallab turgan amerikalik Brayan Gottfrid (1004 o‘yin, 680 g‘alaba, 324 mag‘lubiyat) Nadaldan atigi 4 uchrashuv ko‘proq o‘tkazgan. Bu ko‘rsatkich bo‘yicha rekordchi esa amerikalik Jimmi Konnors sanaladi (1535 o‘yin, 1256 g‘alaba, 279 mag‘lubiyat).

Eslatib o‘tamiz, Nadal – ayni damda faoliyatini davom ettirayotgan hamda 1000 uchrashuvda kortga chiqqan uchinchi tennischidir. Undan avval shveysariyalik Rojyera Federer (1340) va ispaniyalik David Ferrer (1034) bu natijaga erishgan.