Peterburglik stomatolog aldov yo‘li bilan bemorning 22ta sog‘lom tishini sug‘urib oldi

Peterburg tergovchilari firibgarlik yo‘li bilan bemorning 22ta sog‘lom tishini sug‘urib olgan shifokor-stomatologga nisbatan tergov ishlarini olib bormoqda. Bu haqda Tergov qo‘mitasining Sankt-Peterburg bo‘yicha rahbari ma'lum qildi.

Tergov ma'lumotlariga ko‘ra, 2014 yili Frunze tumanidagi xususiy klinikalardan birining muassisi va shifokori "43 yoshli mahalliy fuqaro bo‘lgan ayolni ko‘rsatilgan stomatologiya xizmatlari borasida aldagan". Natijada, ayolning 22ta sog‘lom tishini olib tashlab, "sifatsiz protez tish" o‘rnatishgan. Mazkur amaliyot uchun bemor ayol 843 ming rubldan ortiq mablag‘idan ham ayrilgan. 

Bundan tashqari, tergovchilar shifokorning shunday jinoyatlarni bir necha bor amalga oshirganiga doir ma'lumotni ham tekshirishmoqda. Hozirda, shifokor ayolga nisbatan ehtiyot chorasi qo‘llash va unga ayblov e'lon qilish masalasi ko‘rib chiqilmoqda.