Obama AQShning iqlim bo‘yicha kelishuvdan chiqishiga munosabat bildirdi

AQShning sobiq prezidenti Barak Obama AQSh iqlim bo‘yicha Parij kelishuvini tark etib, kelajakni inkor etmoqda, deb aytdi. Bu haqda "Blumberg" axborot agentligi xabar bermoqda. 

AQSh prezidenti Donald Tramp 1 iyunda AQShning kelishuvdan chiqishini e'lon qildi. U bu masala bo‘yicha o‘zining nutqida mamlakat bu sohada yangi bitimni tuzish bo‘yicha yangi muzokaralar boshlashini aytgan. 

"Bu ma'muriyat kelajakni inkor etuvchi kichik sondagi davlatlar qatoriga qo‘shilgan bo‘lsa ham, men ishonamanki, bizning davlatlar, shaharlar va korxonalar faollashib, bizda mavjud bo‘lgan yagona sayyorani kelajak avlodlar uchun saqlab qolishda yetakchi rol o‘ynash va ko‘mak berish uchun yanada ko‘proq ishni amalga oshiradilar", deb aytgan Obama. 

Obama Parij kelishuvi "korxonalar, olimlar, muhandislarga yuqori texnologik va past uglerodli investitsiyalar va innovatsiyalar salohiyatini mislsiz ko‘lamda ochish imkoniyatini berganini" ta'kidlab o‘tdi.