Kriptovalyutalar bozori kapitallashuvi 100 mlrd dollardan oshdi

Kriptovalyutalar (virtual pul) bozorining kapitallashuvi 5 iyundan 6 iyunga o‘tar kechasi 100 mlrd dollardan oshdi. Bu raqam eng cho‘qqiga chiqqan vaqtda 101,913 mlrd dollarni qayd etgan. Bu Amerikaning ko‘plab yirik kompaniyalari kapitallashuvi bilan barobardir. 

Xususan, Bitcoin kursi 2999,91 dollargacha ko‘tarildi, deb xabar qilmoqda forklog Coinmarketcap ko‘rsatkichlariga asoslangan holda. Shunday qilib, kriptovalyutalarning 100 mlrd dollaridan 46 mlrdi aynan bitkoin virtual puliga to‘g‘ri keladi.

Bu o‘sishga osiyo bozorlaridagi faollik turtki bergan. Jumladan, Yaponiyaning BitFler, Koreyaning Bithum va Xitoyning OKCoin Huobi birjalari bitkoin uchun asosiy taklifni shakllantiradi. Ushbu savdo maydonlaridagi narxlar esa Amerika va Yevropa bozorlaridagi qaraganda ancha yuqoridir. 

Masalan, OKCoin birjasida bitkoin 2940 dollardan sotilayotgan bo‘lsa, Bitstamp birjasida uning qiymati 2820 dollar atrofida. 

Aytish joizki, may oyi oxirida kriptovalyutalar bozori kapitallashuvi keskin o‘sishni qayd etgan edi. Biroq, keyinchalik, ikki kun ichida 30 mlrd dollarni yo‘qotdi. Umuman, bitkoin yil boshidan 150 foizga qimmatlashdi. 25 may kuni kriptovalyuta bir kun ichida 2500, 2600 va 2700 dollargacha ko‘tarilgan va o‘z tarixida birinchi marta 2800 dollarga yaqinlashgan edi.