Messi to‘yidagi mehmonlarga sovg‘alarni xayriyaga almashtirishni so‘radi

«Barselona» va Argentina terma jamoasi hujumchisi Lionel Messi to‘yiga kelgan mehmonlarga sovg‘a berishdan ko‘ra, o‘zi tashkil qilgan xayriya fondiga mablag‘ o‘tkazib berishlarini so‘ragan. Bu haqda Goal.com internet-nashri xabar tarqatdi.

30 yoshli futbolchi 2009 yilda sog‘liqni saqlash, ta'lim va sport sohasida bolalarga ko‘maklashish maqsadida ushbu xayriya fondini tashkil qilgandi.

Messining to‘yi bugun, 30 iyun kuni Argentinaning Leo tug‘ilib o‘sgan Rosario shahrida bo‘lib o‘tadi. Messi ikki farzandining onasi bo‘lgan Antonella Rokkutstsoga rasmiy ravishda uylanmoqda.