Prezident rolini o‘ynamoqchi bo‘lgan Tramp saylovlarda ishtirok etishni afzal ko‘rgan

Ikki yil avval Donald Tramp “Akula tornadosi” deb nomlangan filmning 3-qismida AQSh prezidenti rolida suratga tushmoqchi bo‘lgan. “RIA Novosti” axborot agentligining AQSh OAVga iqtibos keltirgan holda ma'lum qilishicha, dastlab bu rolga Alyaskaning sobiq gubernatori Sara Peylin taklif qilingan, biroq u bilan kechgan muzokaralar muvaffaqiyatsiz yakunlangan.

Shundan keyin bu rolni ijro etish taklifi o‘shanda tadbirkor va boshlovchi bo‘lgan Trampga bildirilgan. “Donald «ha” deb aytgan. U unga taklif qilinayotgan narsadan juda hayratda edi”, deb aytdi filmni suratga olish bilan shug‘ullangan Asylum kompaniyasi asoschilaridan biri Devid Lett.

Ma'lum qilinishicha, Tramp bilan muzokaralar yetarlicha muvaffaqiyatli kechib, hattoki shartnoma ham tuzilgan.

Biroq bir necha haftadan keyin Tramp advokati uning prezidentlik saylovlarida ishtirok etmoqchiligini va filmlarda suratga tushish uchun vaqti yo‘qligini aytib, rad javobini bergan.