OAV: Mediamagnat Rupert Merdok Trampning maslahatchisini ishdan haydashga chaqirdi

Mediamagnat Rupert Merdok AQSh prezidenti Donald Trampni o‘zining strategik masalalar bo‘yicha maslahatchisi Stiv Bennonni ishdan haydashga chaqirdi. Bu haqda The New York Times yozmoqda.

Ta'kidlanishicha, Merdok Tramp bilan bu haqda Oq uydagi tushlik davomida gaplashgan, bu davlat rahbari 4 avgust kuni ta'tilga ketishidan avval yuz bergan.

Nashr ma'lumotlariga ko‘ra, tushlikda Trampning kuyovi Jared Kushner va prezident ma'muriyatining yangi rahbari Jon Kelli ham ishtirok etgan.

Aniqlik kiritilishicha, Tramp Merdokning maslahatiga qarshilik ko‘rsatmagan, Bennondan tashvishda ekanini bildirgan.

Avvalroq AQSh ommaviy-axborot vositalari AQSh prezidenti Donald Tramp Oq uy ishi haqidagi ma'lumotning tashqariga sizib chiqishida o‘zining strategik masalalar bo‘yicha maslahatchisi Stiven Bennondan gumon qilayotganini aniqlashgani xabar berilgandi.