Boks, JCh-2017. Iqboljon Xoldorov keyingi bosqichda

Foto: AIBA

Germaniyaning Hamburg shahrida AIBA shafeligi ostida boks bo‘yicha Jahon chempionati davom etmoqda.

Bugun ringga chiqishi kutilayotgan 5 nafar o‘zbekistonlik bokschilarning ikki nafari o‘z janglarini o‘tkazib ulgurdi.

Dastlab, 56 kilogrammgacha bo‘lgan vaznda ishtirok etayotgan Murodjon Ahmadaliyev qozog‘istonlik Qayrat Yeraliyevga qarshi jang o‘tkazdi va 1:4 hisobida yutqazdi.

64 kilogrammgacha bo‘lgan vaznda O‘zbekiston sharafini himoya qiladigan Iqboljon Xoldorov kolumbiyalik Jon Guterres bilan kuch sinashdi. 20 yoshli Iqboljon raqibiga hech qanday imkoniyat qoldirmadi. U jang davomida to‘liq ustunlikka erishdi va g‘alabani rasmiylashtirdi — 5:0 (30:27, 30:27, 30:26, 30:26, 30:25).

Shu tariqa, Xoldorov jahon chempionatining chorak finaliga yo‘l oldi.

Bugun yana 3 nafar o‘zbekistonlik bokschilar kuch sinashadi.

Tayyorlagan Азимжон Бердибеков

#Murodjon Ahmadaliyev #AIBA #Iqboljon Xoldorov

25 avgust kuni Germaniyaning Hamburg shahrida Boks dunyosining 2017 yilgi eng nufuzli musobaqasiga start berildi. 25 avgustdan 2 sentabrgacha Hamburg shahri AIBA World Boxing Championship-2017 musobaqasiga mezbonlik qiladi. Unda O‘zbekiston terma jamoasi kamsonli mamlakatlar singari to‘liq tarkibda ishtirok etadi.