Britaniyadagi plyajlardan birida zaharli bulut sababli ko‘plab odamlar jabrlandi

Britaniyadagi ommaviy plyajlardan biri, Istburndagi Bichi-Xed plyajiga kelgan 230 dan ko‘proq odam ko‘zlarida achishish, qayt qilish, nafas olishlari qiyinlashgani va tomoqlari achishayotgani shikoyatlari bilan shifokorlarga murojaat qilishgan. Bu haqda The Independent nashri xabar bermoqda. 

Barcha jabrlanuvchilarga tibbiy yordam ko‘rsatilgan. Hukumat voqea joyiga yaqinlashmaslikni tavsiya qilgan. Mahalliy aholiga uylari derazalari va eshiklarini yopiq holda tutish buyurilgan. Voqea tergov qilinmoqda, politsiya zaharli bulut qayerdan paydo bo‘lganini aniqlashga urinmoqda.

Shunisi ma'lumki, zaharli bulut plyajga dengiz tomondan kelgan. So‘ngra u sharqqa tomon tarqalib ketgan.