Renault, Nissan va Dongfeng hamkorligida qo‘shma korxona ochiladi

Renault va Nissan kompaniyalari Xitoyning Dongfeng Motor avtomobil ishlab chiqaruvchisi bilan hamkorlikda Markaziy Xitoydagi Xubey provinsiyasida elektromobillar ishlab chiqara boshlaydi. Yangi korxona eGT New Energy Automotive nomini oldi. Bu haqida Renault matbuot xizmati xabar berdi. 

Ma'lumotlarga ko‘ra, Renault va Nissan tashkil qilingan kompaniyaning 25 foizdan, Dongfeng esa - 50 foiz aksiyasiga egalik qiladi. Korxona yiliga 120 mingtagacha elektrokar  ishlab chiqarishi kutilmoqda. Rejaga ko‘ra, ishlab chiqarish 2019 yilda boshlanadi.

Ta'kidlash joizki, Dongfeng Motor shundoq ham Renault va Nissan bilan hamkorlik qiladi, kompaniya Xitoy bozori uchun Kadjar va Teana avtomobillarini ishlab chiqaradi. 

Xitoy Avto ishlab chiqaruvchilar assotsiatsiyasining ma'lumotlariga ko‘ra, o‘tgan yilning o‘zidayoq mamlakatda 256,8 mingdan ziyod elektromobil sotilgan, bu yillik hisobda 121 foizga ko‘p. 2016 yilning oxirida XXR haydovchisiz mashinalarni sinovdan o‘tkazuvchi tajriba zonasini ishga tushirdi. Loyiha Renault, Dongfeng Renault Automotive Company va Caidian developer guruhi tomonidan amalga oshirilgan.