AQShda «O‘zbekiston: Sharq ertagi» nomli ko‘rgazma​ ish boshlamoqda

28 avgust kuni AQShning Florida universitetida ish boshlagan «O‘zbekiston: Sharq ertagi» nomli ko‘rgazma rasman 1 sentabr kuni ochilib, 28 oktabrga qadar davom etishi ma'lum qilindi. Tadbirni Fulbrayt dasturi ishtirokchisi Albina Hartner tashkillashtirmoqda.

Ko‘rgazmada o‘zbekistonlik taniqli fotograf Ernest Kurtveliyev suratlari va mashhur o‘zbek hunarmandlarining kulolchilik va to‘qimachilikka oid asarlari namoyish etilishi rejalashtirilgan. Shuningdek, 15 sentabr va 20 oktabr kunlari universitet binosida O‘zbekiston madaniyat va tarixi, xalqining qadriyatlari haqida ilmiy ma'ruza darslari bo‘lib o‘tishi belgilangan.

«Ko‘rgazma ikki mamlakat xalqlarini bir-biriga yanada yaqinlashtiradi, amerikaliklarning O‘zbekiston tarixi va madaniyatiga, buguniga sayohat qilish imkoniyati paydo bo‘ladi», deydi tashkilotchi.

Bundan tashqari, 20 oktabr kuni Florida universitetida o‘zbek milliy folklor raqs turkumlarining tomoshasi bo‘lib o‘tadi.