Yaqin Sharq va Markaziy Osiyo markaziy banklari rahbarlarining yig‘ilishi bo‘lib o‘tdi

2017 yil 13 oktabr kuni XVJ va Jahon banki boshqaruv direktorlari Kengashi majlisining birinchi kunida Yaqin Sharq va Markaziy Osiyo mamlakatlari Markaziy banklari rahbarlarining yig‘ilishi bo‘lib o‘tdi. Anjumanda O‘zbekiston Markaziy banki rahbari Mamarizo Nurmuratov ishtirok etdi.

Unda dunyoning ushbu mintaqalarida va umuman jahondagi pul-kredit siyosatining instrumentlarini takomillashtirish istiqbollari muhokama qilindi. Mintaqalarda yanada yuqori o‘sishga turtki berish va barqarorligini ta'minlashda zarur bo‘lgan pul-kredit va moliya siyosatini isloh qilishga katta e'tibor qaratilgan. 

O‘zbekistonning AQShdagi elchixonasiga ko‘ra, O‘zbekiston Markaziy banki raisi majlis ishtirokchilariga respublika pul-kredit siyosatida olib borilayotgan islohotlar, xususan valyuta bozorini liberallashtirish hamda ushbu yo‘nalishdagi rejalar va vazifalar haqida ma'lumot berdi.