Ichki ishlar vazirligi Akademiyasining kasbiy tayyorgarlik fakultetiga qabul qilish tartibi belgilandi

O‘zbekiston Adliya vazirligi tomonidan Ichki ishlar vazirligi Akademiyasining kasbiy tayyorgarlik fakultetiga qabul qilish tartibi davlat ro‘yxatidan o‘tkazildi.

Fakultetga tanlov asosida:

yoshi o‘n sakkizdan kichik va o‘ttizdan katta bo‘lmagan, o‘rta maxsus, kasb-hunar va oliy ma'lumotga ega bo‘lgan, harbiy xizmatni o‘tagan, sog‘ligining holatiga ko‘ra va jismoniy tayyorgarligi bo‘yicha xizmat qilishga yaroqli deb topilgan shaxslar qabul qilinadi.

Tanlov ikki bosqichda (dastlabki va maxsus-professional) o‘tkaziladi. Dastlabki tanlov hujjatlarni o‘rganish, dastlabki suhbat, jismoniy tayyorgarlikni baholash, tibbiy ko‘rikdan iborat. Maxsus-professional tanlov hujjatlarni o‘rganish, tibbiy ko‘rik, kasbiy-psixologik layoqatni baholash va yakuniy suhbatdan iborat.

Fakultetda o‘qish muddati ofitserlar tarkibi xodimlari uchun 6 oy, serjantlar tarkibi xodimlari uchun 5 oy etib belgilandi.

Hujjat bilan Ichki ishlar vazirligi akademik litseylari bitiruvchilariga kasbiy-psixologik layoqatni baholash va yakuniy suhbatda ular to‘plagan umumiy ballning 20 foizi miqdorida imtiyoz bali qo‘shib berilishi belgilandi.

Hujjat bilan O‘zbekiston Respublikasi Qonun hujjatlari ma'lumotlari milliy bazasida (www.lex.uz) tanishishingiz mumkin.