JCh-2018 qur'a tashlash shousiga Ivan Urgant boshlovchilik qiladi

Rossiyalik teleboshlovchi va aktyor Ivan Urgant 2018 yilgi jahon chempionati final bosqichiga qur'a tashlash shousiga boshlovchilik qiladi. Bu haqda FIFA ma'lum qildi. 

Qur'a tashlash shousi 1 dekabrda Toshkent vaqti bilan soati 20:00da Kreml saroyida boshlanadi. Shou Rossiyaning Birinchi kanali orqali namoyish qilinadi. Unda shuningdek qo‘shiqchilar Alsu va Larisa Dolina qur'a tashlash uchun maxsus yozilgan qo‘shiqlar ijro etishadi.

Shou rejissyori Feliks Mixaylovning aytishicha, qur'a tashlashda his-tuyg‘ular kuchi, kutish hayajoni va chempionat mezboni sifatida Rossiyaning chiroyi namoyish qilinadi. “Albatta biz dastlabki qur'a tashlashda biz tomondan boshlab berilgan “orzu” mavzusini – parvoz qilish orzusi, kuchli bo‘lish va g‘olib bo‘lish orzusini bu shouda ham davom ettiramiz. Bolaning orzusi u o‘smirdan jahon futboli afsonasigacha yo‘lni bosib o‘tgandan keyin haqiqatga aylanadi. Shou epizodlaridan birida u o‘tmishning buyuk futbolchilari: Lev Yashin,. Pele, Maradonani uchratadi. Sahnadagi va zalda o‘tirgan futbol hamda estrada, jaz va opera yulduzlari bizning shior "Smotri, kak soydutsya zvezdy" (Qara, yulduzlar qanday kesishadi)ni tasdiqlashadi”, deb aytgan rejissyor. 

Qur'a tashlash  jarayonini sobiq ingliz futbolchisi Gari Lineker va rossiyalik jurnalist Mariya Komandnaya olib borishadi. Marosimda Rossiya futbol ittifoqi birinchi vitse-prezidenti Nikita Simonyan va argentinalik Maradonna, italiyalik Fabio Kannavaro, fransiyalik Loran Blan, angliyalik Gordon Benks, braziliyalik Kafu, ispan Karles Puyol, urugvaylik Diyego Forlan va nemis Miroslav Klozelar ishtirok etadilar.