Turkiyada maktab o‘quvchilari o‘qqa tutildi 

Turkiyaning G‘aziantep shahridagi maktablardan biri yonida 56 yoshli erkak otishma sodir etishda gumonlanmoqda. Otishma oqibatida 6 kishi, jumladan 5 nafar o‘quvchi yaralangan. Bu haqda NTV telekanali xabar bermoqda.   

Ma'lum qilinishicha, to‘yda ko‘ngilxushlik qilayotgan gumonlanuvchi to‘y o‘tayotgan joy yaqinidagi maktab oldidagi maydonchada futbol o‘ynayotgan bir guruh o‘quvchilarga o‘q uzgan. 10 yoshdan 17 yoshgacha bo‘lgan 5 o‘quvchi va bir katta yoshli odam yaralangan. Jabrlanuvchilar shifoxonaga yetkazilganlar, ularning hayotlari xavf ostida emas.  

Mahalliy rahbariyat ma'lumotlariga ko‘ra, gumonlanuvchi avval sodir etgan 6 jinoyati uchun qidiruvda bo‘lgan. Politsiya uni qo‘lga olish bo‘yicha operatsiyani amalga oshirmoqda.