Rossiyadagi “K-Rauta” do‘konlari tarmog‘i 12 mlrd rublga sotildi

Finlyandiya riteyleri Kesko Rossiyadagi “K-Rauta” uy va ta'mirlash mahsulotlari do‘konlari tarmog‘ini Fransiyaning Leroy Merlin kompaniyasiga sotish bo‘yicha kelishuvga erishdi. Kelishuv qiymati 12 mlrd rubl yoki 169 mln yevroni tashkil qiladi.   

Leroy Merlin Sankt-Peterburgdagi 8 ta, Moskvadagi 3 ta va Kalugadagi bitta do‘konni oladi. Bu do‘konlar o‘rnida Leroy Merlin do‘konlari ochiladi. Kelishuvga kiritilmagan Yaroslavl va Tuladagi ikkita do‘kon 2018 yilning birinchi yarmi davomida yopiladi.

“K-Rauta” do‘konlar tarmog‘i Kesko’ning Rossiyadagi so‘nggi aktivi edi. 2016 yilda riteyler “K-Ruoka” oziq-ovqat do‘konlari tarmog‘ini “Lenta” riteyleriga 11 mlrd rublga sotib yuborgandi, uning sport anjomlari sotiluvchi Intersport do‘konlari xususiy sarmoyachilar guruhi tomondan xarid qilingandi.