Saudiya Arabistoni milliy yadroviy dasturini qabul qildi 

Saudiya Arabistoni hukumati 13 mart kuni atom energetikasi sohasidagi milliy dasturni ma'qulladi. Bu haqda qirollik tashqi ishlar vazirligi ijtimoiy tarmoqdagi mikroblogida ma'lum qilgan.

Bu dastur “butun yadroviy faoliyat xalqaro kelishuvlar bilan belgilangan tinchlik maqsadlariga xizmat qilishini” ko‘zda tutadi. Bundan tashqari, bu hujjatga ko‘ra, Saudiya Arabistoni “atom sohasida ochiq-oydinlik tamoyiliga amal qilmoqchi” hamda “yadroviy xavfsizlik standartlariga mustaqil regulyator talablariga mos ravishda rioya qilmoqchi”. Qirollik, shuningdek, “radioaktiv chiqindilarni utillashtirish masalasini hal qilishda eng yuqori standartlarga amal qilishni o‘z zimmasiga olgan”.

Ayni vaqtda Saudiya Arabistoni ikkita blokdan iborat birinchi atom stansiyasi qurilishi uchun tanlov e'lon qilgan. Bu stansiya qurilishi uchun shartnoma 2018 yil oxirigacha imzolanishi kutilmoqda.