Usmonxon Alimov: Butun dunyo O‘zbekistonda diniy sohada olib borilayotgan islohotlarga tahsin aytmoqda

Respublika Qur'on musobaqasi tashkilotchilarining aksariyati g‘olib vodiy viloyatlaridan birining vakili bo‘lishi mumkin, degan taxmin qilishgan. Biroq, bandasining emas, Allohning xohlagani bo‘lishi yana bir marta o‘z isbotini topdi. O‘zbekiston Musulmonlari idorasi raisi, muftiy Usmonxon Alimov XPKining navbatdagi sessiyasida shu haqda so‘z yuritdi. U, shuningdek O‘zbekistondagi diniy islohotlarni butun dunyo olqishlayotganini ta'kidladi.

“O‘zbekistonda diniy islohotlar juda katta bo‘lyapti, buni hammamiz ko‘rib turibmiz. “Jaholatga qarshi ma'rifat” tamoyilining o‘zi diniy sohada olib borilayotgan islohotlarning eng yuksak g‘oyasi bo‘ladi. Ana shu asosda ish olib boriladi. 

Yana bir narsa, bugungi kunda diyorimizga Allohning ne'matlari marhamat qilingan ekan, mana 24 aprel kuni 1-Respublika Qur'on musobaqasining yakuniy bosqichini yakunladik. Bu musobaqani o‘tkazishimiz butun dunyoda katta rezonans berdi. Ular O‘zbekistonda barcha sohalar singari diniy sohada ham olib borilayotgan islohotlarga tahsin aytmoqda. 

Allohning marhamatini qarangki, biz ushbu musobaqada qorilar diyori bo‘lgan Andijondan, yoinki Namangan yo Farg‘onadan g‘olib chiqsa kerak, deb o‘ylagan edik. Qorilarimiz juda tirishqoqlik bilan bellashdilar. Ammo Allohning inoyatini qarangki, musobaqaning oliy o‘rin sohibi qoraqalpoq diyordan chiqyapti. Buni Allohning marhamatining shu diyorga yog‘ilganini ko‘rsatadi. Bandaning emas, Allohning aytgani bo‘ladi. Bizga butun dunyodan kelayotgan tabriknomalarda bizlarning bu sohadagi ishlarimizni e'tirof etishmoqda”, - dedi muftiy Usmonxon Alimov hazratlari.