Prezident 9 may kuni poytaxtdagi bayram tadbirlarida qatnashadi

O‘zbekiston prezidenti Shavkat Mirziyoyev 9 may - Xotira va qadrlash kuni bayrami munosabati bilan o‘tkaziladigan tadbirlarda qatnashish uchun Toshkent shahrining bir necha nuqtalarida bo‘ladi.

«Kun.uz»ga ma'lum bo‘lishicha, prezident ertaga Xalqlar do‘stligi maydoniga qaytarilgan Shomahmudovlar oilasi kompozitsiyasini borib ko‘rishi, Olmazor tumani hokimiyati binosi oldidagi maydonga borib, general Sobir Rahimov haykalini ziyorat qilishi rejalashtirilgan.

Shuningdek, Shavkat Mirziyoyev shu kuni Toshkent Botanika bog‘ida o‘tkaziladigan bayram marosimlarida qatnashadi. 

Bog‘da bir necha haftadan buyon 9 mayga tayyorgarlik ishlari olib borilmoqda. Yo‘laklar ta'mirlangan, ba'zi o‘simliklar qayta ekilgan, bog‘ hududiga Ikkinchi jahon urushini gavdalantiruvchi eksponatlar olib kelingan.