Parijda bolakayni yuqori qavatdan yiqilishdan qutqarib qolgan muhojir Makron bilan uchrashadi (video)

Fransiya prezidenti Emmanuel Makron Parijda bir bolakayni ko‘p qavatli uydan yiqilishdan qutqarib qolgan malilik muhojir bilan uchrashadi. Bu haqda “Frans Press” axborot agentligi ma'lum qildi. 

Ma'lum qilinishicha, uchrashuv 28 may kuni mahalliy vaqt bilan soat 09.50da bo‘lib o‘tadi.

BFMTV telekanali ma'lumotlariga ko‘ra, voqea 26 may kuni kechki vaqt yuz bergan. 4 yoshli bola 5-qavatdagi uyning balkonidan osilib qolgan va istalgan vaqt yiqilib tushishi mumkin bo‘lgan. Voqea guvohi, malilik Mamudu Gassama sanoqli soniyalarda 5-qavatga tirmashib chiqib, bolakayni qutqarib qolgan.

“Bu jasur va mard erkak o‘z hayotini xavf ostiga qo‘yib bolaning hayotini qutqarib qoldi”, deb yozgan tvitterda Parij meri Ann Idalgo. Mer ushbu erkak muhojir ekanligini bilgach, “Parij uning Fransiyada qo‘nim topishga urinishini qo‘llab-quvvatlashini” qo‘shimcha qilgan.