Erkak aybdorlik hissi sababli 44 yil avval avtoturargoh uchun to‘lamagan pulni to‘ladi  

AQShning Pensilvaniya shtatida yashovchi erkak o‘zini aybdor his qilib, 44 yil avval avtoturargoh uchun to‘lamagan haqni to‘lashga qaror qilgan. Bu haqda Associated Press axborot agentligi ma'lum qildi. 

Shtatning Minersvill shahri politsiya bo‘limida aytilishicha, bo‘limga ichida 5 dollar va maktub bo‘lgan konvert kelgan. Politsiya boshlig‘i Maykl Komsning aytishicha, maktubda noma'lum erkak o‘zining qilmishi uchun uzr so‘ragan. 

“Hurmatli politsiya departamenti, men bu chiptani o‘zim bilan 40 yildan ko‘proq olib yurdim. Har doim uning pulini to‘lamoqchi bo‘lib yurardim. O‘z ma'lumotlarimni ma'lum qilmaganim uchun kechirasizlar. Hurmat bilan Deyv”, deb aytilgan maktubda.

Ta'kidlanishicha, erkak 1974 yildagi parkovka chiptasi uchun 2 dollar to‘lashi kerak bo‘lgan, biroq u 5 dollar jo‘natgan. Ayni vaqtda bunday chipta 20 dollar turadi.